عرفته بالصدفه و عجبني اسلوبه و تعامله الراقي و استمرت الايام بينا و انا اعجابي فيه يزيد و اقول فيه رجل بالكويت جذيه لأن اللي اشوفه بين شباب الكويت و اسمعه عنهم انهم ما يفكرون بالحب همهم الوحيد الرغبة الجسدية و الفضايح و اللف و الدوران و الجذب اكيد اصابع الايد مو سوا بس هذا الظاهر بشكل عام ، شباب مهنتهم و شغلهم الشاغل يقعدون بالقهاوي و الفراره بالمجمعات علشان يتصيدون البنات انا ما اتكلم عن شباب 20 و 25 لا اتكلم عن اعمارهم 30 وفوق و ترى البنات مو احسن منهم صايرين مثلهم و اكثر بعد .
ادري طلعت بره الموضوع (:
حبيبي عمره 38 يعني بقمة النضج الفكري و النفسي و الجسدي كامل و الكامل الله اصل و فصل و وظيفه محترمه في مكان راقي وتجارب من الحياة تعلم منها الكثير ، اول ما اعترف بالحب اهو و بصراحه فاجأني بتصريحه انا ما قلت له غير لا تتسرع و طبعا انا ما قلت له اللي بقلبي من كثر خوفي ان تكون نزوه منه وعلاقة عابره ياخذ منها اللي يبي و يمشي و مع الايام لقيت نفسي بدون مقدمات اقول احبك لأن بالفعل ملك قلبي و تفكيري حبيت سوالفه و اسلوبه و المواضيع اللي نتكلم فيها بعيده كل البعد عن الرغبه او اي شي يخدش الحيا حبني لذاتي و اخلاقي
حسيته رجل بكل معنى الكلمه
دلعني و دللني و لا قصر معاي بشي احتواني و عطاني كل العواطف اللي محتاجتها حسيته الرجل الحبيب اللي عشقته و عوضني الاب اللي فقدته بطفولتي و الاخ اللي يخاف علي و يحميني و الصديق اللي يسامرني و ينصحني و يعلمني
احساسي به كرجل فاق كل الرجال ...
خلال شهر حسيت اني اعرفه من سنين عرف كل شي عني ولا عندي شي اخاف واستحي منه عرف اهلي و حياتي اشلون اعيشها و يومي اشلون يمر علي بكل التفاصيل علشانه ابتعدت عن كل الناس و الكل قام يفقدني و يقولي ليش متغيره كنت مابي شي يشغلني عنه حتى رفيجاتي قللت اتصالاتي و طلعاتي معاهم بس علشان اكون له بروحه و اذا احتاجني يلقاني بثواني ، صار اهو محور حياتي و كل شي يدور حوله حتى مزاجي و ضحكتي على حسب مزاجه اشلون صاير .
صرنا بالهوا نسرح و نمرح ...
و بنظرنا صارت الدنيا إنت و أنا ...
كل منا يغلب الثاني بطيبه ...
كل منا أصدق إحساس لحبيبه ...
نعيش و نبضنا دايم يردد :
عسى الله لا يفرقنا
حبه لي زاد ما نقص لكن دوام الحال من المحال بدت التغييرات و الوجهه الثاني يبين ما اقول انه وجهه شرير او كذاب لكن كل انسان له عيوب و زلات و مع هذا عشقت عيوبه مثل ما عشقت مزاياه و اختلافاته . عيبه معاي ان من تجارب الحب و العلاقات الفاشله اللي مر فيها كله في باله اني راح اخطي مثلهم و اني راح اتغير في يوم من الايام لكن والله و ربي علي شاهد اني اشوف الله و اشوف رضاه علي اني اخاف الله فيه و اشتري خاطره محد من الرياييل يترس عيني بعده و لا حتى اشوفهم بنص عين ، انا بنت و اطلع و اشوف و اتعرض حق نظرات اعجاب و تحرش بس ما يهزون شعره من راسي
معاه مافي مشاكل فعليه مثل الشك او الخيانه واللعب او الكذب ولله الحمد فيه ثقه متبادله و احترام ويثق اني لو اكون بين الف ريال ما راح اهتز او يأثرون علي .
حرمني من كلام الحب و الشوق و العشق صرنا نتكلم بالساعات بكل المواضيع عن اوضاع الديره و السياسه و الاقتصاد و حياتنا الاجتماعيه عن اهلي و اهله و عن كل شي الا كلمة ( احبج ) يكتبها بمسج بين كل فتره و اعني بالفتره كل شهر و نص الى شهرين يعني حده حارمني من الكلمه اللي تحتاجها كل بنت بس للأمانه احس فيه يحبني ولا مقصر بإهتمامه فيني والهدايا اللي يقدمهم لي بين كل فتره و الثانيه مما غلا ثمنه لكن احتاج كلمة حب ما يكفي الاحساس احتاج اسمعها و احسها و اشوفها بتصرفاته
لما افكر بيني و بين نفسي ليش ما يقولها لي و حارمني منها القى لها تفسير واحد مايبي يبين اشكثر يحبني علشان ما اتغير عليه و اكون انا اللي دايما بحاجته و لا يبين لي ضعفه و حاجته لي بس مو عيب لي حسيت بحاجته وشوقه لي حتى شوفته علي بالحسره اذا قلتله ابي اشوفك مشتاقتلك يتعذر بأي شي لكن انا قمت اقولها له بطريقه ثانيه اشتريله هديه و اقوله ابي اعطيك شي و صارت حجه لي اني اشوفه بهالدقايق . صارت فيني فقرت كلمه حلوه ابيه يتغزل فيني و يقولي كلام حب و غزل ماقلت كل يوم بس خله ينطق اشوي ادري ان كل يوم احبج احبج احبج ملاقه و ملل ولا راح احس بمعناها من كثر ما اسمعها بس احتاج يحسسني بأنوثني و ان اهو رجلي صار جنه واحد من الربع غشمره و ضحك و نسولف بكل شي الا حبنا !!
يمكن اهو راح يقرا هالكلام و اتمنى ان يفهم كل حرف كتبته و يحس باللي في صدري صار فيني جفاف بالحب انا فعلا مو مقصره معاه اقوله احبك يقولي انزين اقوله قولي كلمه حلوه يرد كلمه حلوه يعني يستحف دمه ):
اشلون اتصرف معاه احيانا اقول كله مني انا اللي بينت له اشكثر متعلقه فيه و احبه بس هذا مو عيب هذا اللي لازم يصير بين كل اثنين يحبون بعض
علموني شسوي ؟!!
مهما سويت فيني راح اظل احبك و انت اللي ترست عيني و قلبي ولا اشوف حياة لي من بعدك